jetzt hab i heit meine ersten Platzerl backen und scho hab i a Riesenproblem.
Die Platzerl, in dem Foi sanns leckere, gschmackige Kokosmakronen, sucha a Platzerl wo koaner sie find!
Zumindest bis Weihnachten oder wenigstens net vor dem ersten Adventssonntag.
I hob zwar vor einiger Zeit a sichers Platzerl für mei Armbanduhr und mein Lieblingschal g'funden, die zwoa find i scho seit am Jahr nimmer, aber i woas net wo des is.
Zerst hob i die Bix mit de Platzerl im Wohnzimma hinta de Biacher versteckt, da hob i s scho nach 10 Minuten wieder gfunden.
Sechs Platzerl weniger!
Im Kellerregal hinta da Bierkisten hots grad amoi a hoibe Stund dauert na war i wieder dort.
Scho wieda fünf Platzerl weniger!
Da Keller is ohnehin net sicher, weil de Meis trau i a ois zua.
In der Garasch hob is Minuten später gfunden weil i no amoi zum eikaffa gfahrn bin.
Fünf Platzerl weniger!
Na hob is glei im Koffaraum hintam Vabandskasten vasteckt und as Warndreieck draufglegt und wia i im Parkhaus aussteig triff i mein Freind an Anderl.
Desmoi glei dreizehn Platzerl weniger!
Jetztad hob i scho unsa Nachbarin g'fragt obs sies mir vastecka dad, nachad hots in de Bix neigschaut, probiert und so an Glanz in de Augn kriagt wie a kloans Deandl vorm Christbaam, dass i ma denkt hob "o je, da sanns a net sicher"
Acht Platzerl weniger!
Und jetzad wo i grad mit de restlichen Platzerl in da Küch steh und überleg, kimmt a grad mei Frau mit da Tochter zur Dia nei: "Mei Papa, Du host ja scho Platzerl backen"
Jetzt brauch i a koa Platzerl mehr für meine Platzerl
©Liederpoet 2011
Keine Kommentare:
Kommentar veröffentlichen